التسامح قوة
كتب/ طلبه عبدالكريم
التسامح
مش كلمة سهلة، ولا قرار بياخدوه الضعفاء،
التسامح شجاعة ناس تعبت، اتوجعت، واتكسرت…
وبرغم كده اختارت تقوم، مش تنتقم.
التسامح إنك تشيل من قلبك حجر كان تقيل عليك قبل أي حد تاني،
إنك تقول: كفاية وجع… وتختار تهدأ.
مش لأن اللي قدامك يستاهل،
لكن لأن قلبك تعب من القسوة،
ولأن روحك محتاجة سلام.
فيه ناس فاكرة إن التسامح نسيان،
أو ضعف،
أو تنازل عن الكرامة…
لكن الحقيقة إن التسامح وعي.
وعي إن الغضب بيأكل صاحبه،
وإن الكراهية بتربطك باللي آذاك أكتر مما بتبعدك عنه.
التسامح مش معناه ترجع تثق في نفس الغلط،
ولا تفتح باب اتقفل بالألم،
التسامح معناه تقفل الباب بهدوء…
من غير صراخ،
من غير شتيمة،
من غير ما تشيل حقد معاك في الطريق.
سامح…
علشان تنام وقلبك خفيف،
علشان ضحكتك ترجع صافية،
علشان ما تخليش حد يسرق منك سلامك حتى بعد ما مشي.
وفي الآخر
أجمل انتصار مش إنك تكسب معركة،
أجمل انتصار إنك تكسب نفسك…
وتعيش مرتاح.
