الجرحُ علَّم، القلبُ لم يُسَلّم بعد.

الجرح علم القلب لم يسلم بعد

قلم/وائل عبد السيد

وافتكر ليه ابتديت

ليه جريت وليه عانيت

ليه مشيت من بيت لبيت!

شايل الحلم في خيالك

وافتكر حجم الخسارة

والإشارة والأمارة

افتكر رميّ الحجارة

واللي نجاك م المهالك

وافتكر واضحك في سرِك

ع اللي كان ناوي يضرك

إوعى قوتهم تغرُك

لسه خايفين من كلامك

وافتكر وإزاي هتنسى

إنك أنت حيّ لسه

ف الحياة فيه ألف فرصة

واللي فاتك مش بتاعك

وافتكر طعم المرار

والوجع والانكسار

وانحرافك ع المسار

وإن قلبك لسه سالك

وافتكر طول الطريق

وإن ليك طول ف الغريق

وإن نورك له بريق

والدليل اللي اترمى لك

وافتكرهم لو ناسيهم

أنت من غيرهم وبيهم

وإن أي حد فيهم

عمره ما سابك في حالك 

وافتكر زوغان عينيك

وأما بكيوا كتير عليك

وأنت لسه القوه فيك

وإن ربك وحده شالك

وافتكر إنك مكسّر

لكن أنت مش مقصر

تشتكي وربك ييسر

فالُه يغلب برضو فالَك

وافتكر لو كنت ناسي

ياما عدّت بيك مآسي

وأنت ف الملعب أساسي

عُمر نَفسَك يوم ما خانك

وافتكر علشان تكمل

أي آخر كان له أول

والطريق مهما يطول

جاي وقتك جاي أوانك

وافتكر جرحك معلّم

بس قلب مش مسلّم

ماشي في الأحلام تلم لم 

يعني مش واقف مكانك