ليه فقدنا الاحترام؟
كتب / طلبه عبدالكريم الجازوى
فقدنا الاحترام يوم ما بقينا نتكلم أكتر ما بنسمع،
ويوم ما بقينا نحكم قبل ما نفهم،
ويوم ما افتكرنا إن القوة في الصوت العالي،
مش في العقل ولا في الكلمة الهادية.
فقدنا الاحترام لما بقينا نشوف الناس بعين المصلحة،
اللى يفيدنا نقرّبه،
واللى نختلف معاه نكسّره بالكلام،
كأن الاختلاف عيب،
وكأن الرأى المختلف تهديد.
فقدنا الاحترام لما بقى الاعتذار ضعف،
والتواضع قلة قيمة،
والسكوت حكمة اتنسيت،
وبقى التطاول شجاعة مزيفة.
كبرت المسافات بين القلوب،
مش لأن الطرق بعدت،
لكن لأن النفوس قفلت،
كل واحد شايل همه،
وبيفرغ غضبه في أول حد يقابله.
السوشيال ميديا كشفت اللى جوانا،
خلّت الكلمة سهلة،
والإهانة أسرع من التفكير،
والتجريح أسهل من الصراحة،
وبقينا نرمي وجعنا على بعض
ونستغرب ليه مفيش احترام.
فقدناه لما بقينا نكرّم الغلطان
ونكسّر صاحب الحق،
لما بقينا نلمّع الواجهة
ونسيب الجوهر يتكسر بهدوء.
بس لسه في أمل…
لأن الاحترام مش موضة تخلص،
ولا زمن ويروح،
هو أصل ثابت
عند اللى حافظ على إنسانيته
وسط الزحمة والضجيج.
الاحترام بيرجع
لما نعرف إن الكلمة أمانة،
وإن الإنسان مش رأيه،
وإن القسوة عمرها ما كانت قوة.
بيرجع لما نرجع بشر
قبل ما نكون صح
