هو لو دخل عيني حاجه ينفع اطلعها
طب اي اخطر حاجه ⁉️
كتبت وفاء سليمان محمد
هو لو دخل عيني حاجه ينفع اطلعها طب اي اخطر حاجه ⁉️ ، لو حد دخل في عينه حاجة ينفع أحاول أخرجها ؟
تعالي أقولك الأول اي هو خطر أن يدخل حاجة في عينك
أول حاجة بنخاف منها هي إنها تدخل لكرة العين وبالتالي تأذي العين وتأثر على النظر وفي بعض الحوادث ممكن لا قدر الله تسبب فقدان للبصر
طيب إي الأسعافات الأولية اللي مفروض نعملها عشان نتفادي الخطر ده؟
•أول حاجة هنقول للشخص ميرمش خالص
•نقعده في مكان الإضاءة فيه كويسة ونرفعه رأسه ناحية الاضاءة
•هتقف ورا الشخص وتثبتله رأسه وتبدأ تفحص عين الشخص ده براحة وتطلب منه يبص في كل الاتجاهات
•في حالة شوفت حاجة طافية على العين هتبدأ تفتحله عينه بإيدك وصب ماية جارية على العين وهي مفتوحة وتصب من ناحية جوا لبرا
•طيب لو ده منجحش هتبدأ تجيب قماشة أو منديل نضيف وتحاول تشيل الحاجة اللي شوفتها براحة
•في حالة إن ده منجحش غطي العين وأتوجه لأقرب مستشفى
أما في حالة دخول حاجة حادة للعين وسببت جرح للعين ؟
هنا ممكن نلاقي دم بشكل مباشر أو مجرد خروج سائل دمعي وهتلاقي نظر الشخص ده اتأثر سواء بشكل كلي أو جزئي ..هنا هنتصرف إزاي ؟
•هتساعد الشخص يقعد نص قعدة و ساند ضهره و تبدأ تثبتله رأسه بإيدك
•أطلب منه يثبت عينه الاتنين عشان ده ممكن يزود الجرح حتى لو عين واحدة بس المصابة
•ادي للشخص قماشة نضيفة أو منديل يغطي بيه العين المصابة
•أتوجه لأقرب مستشفى أو اطلب الإسعاف في أقرب وقت
