مدمن اليوم .. .مجرم الغد
بقلم د / سهير محمود عيد
الإدمان فى مصر مش مجرد مشكلة شخصية ، لكنه جرح مفتوح ينزف فى جسد المجتمع كله . الارقام وحدها كفيلة تصدمك ٨٢ % من الجرائم العامة فى مصر مرتبطة يتعاطى المخدرات .
يعنى تقريباً اربع جرائم من كل خمسة سببها الأساسى السم اللى بيدخل جسم الإنسان بإيده .
الأخطر إن معدلات التعاطى عندنا وصلت ضعف المعدل العالمى ، ١٠ % مقابل ٥ % عالمياً .
ده معناه اننا ماشيين بسرعة مضاعفة فى طريق كله ظلام . والاسوأ لما تعرف أن الشباب من ١٥ إلى ٢٩ سنة بيمثلوا ما بين ٦٠ % و ٧٠ % من المتعاطين شباب المفروض يبنوا بكره ، لكن كثير منهم بيهدوا حاضر ومستقبل بسبب جرعة .
الإدمان ما بيقفش عند تدمير الجسد والعقل ، الحقيقة أنه بيسرق من الإنسان ضميره ، يحوله لنسخة مشوهة من نفسه ، نسخة ممكن تسرق اقرب الناس ليها أو حتى تقتلهم .
مشاهد بشعة بتتكرر : ابن يطعن ابوه عشان فلوس ، أخ يسرق أخته عشان جرعة ، سائق يتعاطى يحول الطريق لمجزرة . كل ده مش قصص خيالية ، لكنه واقع بنشوفه فى عناوين الأخبار كل يوم .
التكلفة الاقتصادية الإدمان فى مصر بتوصل ما بين ٢٠ ل ٣٠ مليار جنيه سنوياً ، لكن التكلفة الحقيقية أبشع بكتير .. بيوت اتخربت ، عائلات اتفككت ، أرواح بريئة راحت ضحية .
الحقيقى المُرة إن المدمن مش مجرد ضحية ، هو ضحية لنفسه ، لكن كمان ممكن يبقى مجرم محتمل فى أى لحظة .
الإدمان مش مرض فردى نسيبه للصدفة . لكنه قنبلة موقوتة لتصنع جريمة جديدة كل يوم .
والسؤال اللى ما ينفعش نتهرب منه لحد إمتى حنسيب مدمن اليوم يتحول المجرم الغد؟
وأخيراً… الإدمان مش مجرد ‘ حالة ‘ ينفع نتعاطف معاها من بعيد هو جريمة بتتولد قبل ما تتحول لسكينة أو رصاصة ، كل مرة بنسكت ، كل مرة بنتهاون ، كل مرة نغض الطرف عن شاب بيغرق فى المخدرات ، احنا بنكتب بأيدينا سطر جديد فى صفحة جريمة جديدة .
