قصيدة نور الحضرة
كلمات علي صابر
الرُّوح حاضْرة في الحَضْرة
والمسك فاح على الأبدان
دي وُشُوش نادرة خَضْرا
مِتزَيِّنة بالتقوى والإيمان
فَرَشُوا الأرض نور في كل خطوة
وفي كل حرف ثَواب وإحسان
بوجُودهم تِنْحَلّ أي عقدة
وصُحبتهم خير يِدُقّ البيبان
إتْشَعْبَط في نَفَسْهم الرّاضِيَة
ورَدِّد كلمات تِتْقَلْ الميزان
يِعَلِّموا نَفسك إزاي تبقى صابرة
على أي ابتلاء وامتحان
يِخَلُّوها في الخير والشر شاكِرة
ويِملوا وِجدانك خير وإيمان
تِشوف وُشُوشهم نَضْرة
وعَفو وتسامُح وعِرفان
يا بَخت اللي حاضِر الحضرة
هَيدُوق من حلاوة القرآن
