بلاد الحجارة
بقلم: حسام نشأت محمد
صحيح بلادنا بلاد حضارة
اسألوا وشوفوا الحجارة
هتنطق بلسان فصيح
يا خسارة، وألف خسارة
أيوه بلادنا بلاد حضارة
واسألوا وشوفوا الحجارة
شوفوا النيل كام فرع ليه
كانوا سبعة، نقصوا ليه؟
من السدود اللي عليه
شكلكم عايزين أمارة
اسألوا الهول وأبوه
عن القدامى اللي بنوه
عن عيال حرسوه، باعوه
للخبيث، جمع الإمارة
وصحيح بلدنا بلد حضارة
اسألوا، شوفوا الحجارة
عن ثلاثة أهرامات
هندسة ولا معجزات؟
كنا فين وبقينا فين؟
فينا من فن العمارة
عشان بلادنا بلاد حضارة
اسألوا وشوفوا الحجارة
موحدين من يومنا إحنا
أشركنا، للبدوي ذبحنا
بالمزاج أزينا روحنا
في الهلس شاطرين شطارة
صحيح بلادنا بلاد حضارة
اسألوا وشوفوا الحجارة
في الزراعة بارعين براعة
بعينيكم شوفوا البضاعة
ده قمح روسي فرز رابع
و قطن مصري غار في غارة
صحيح بلادنا بلاد حضارة
اسألوا وشوفوا الحجارة
والصناعة دي حاجة سهلة
نصنع الإبرة في وهلة
أما الخرم ده حاجة صعبة
لازملُه للصين زيارة
عشان بلادنا بلاد حضارة
اسألوا وشوفوا الحجارة
واقتصادنا ده حاجة نار
الجنيه بمية دولار!
بس عام مرة ما قبش
ومن ساعتها في الخسارة
صحيح بلادنا بلاد حضارة
اسألوا، شوفوا الحجارة
كل يوم بيقل حتة
صار نحيف من بعد جتّه
كان يكفي خمسة ستة
بس اليوم ما يجيب خيارة
عشان بلادنا بلاد حضارة
واسألوا حتى الحجارة
سألت واحد قال لي: سيبك
مين عدوك؟ مين حبيبك؟
هو مين إيده في جيبك؟
وقول لي إيه بس العبارة؟
عشان بلادنا بلاد حضارة
واسألوا حتى الحجارة
فين الفن بتاع زمان؟
من هزّ وعُري السيقان؟
والكلاكل والمناهد والعجان؟
بالله قل لي، هذا فن أم دعارة؟
في بلادنا بلد الحضارة
واسألوا حتى الحجارة
الضمير في بلادنا مات
والعدل أصبح ذكريات
والشرف صار للبنات
عار علينا، وألف عارة
عشان بلادنا بلاد حضارة
واسألوا حتى الحجارة
العبيد علينا سادة
والنفاق أصبح عبادة
وشيخنا بيبوس الوسادة
ويشتكي ويبكي بمرارة
عشان بلادنا بلاد حضارة
واسألوا حتى الحجارة
هي فين بس الحضارة؟
مش باقي غير الحجارة
التحضر في النفوس
زي الذهب مطموس غباره
إزاي بلادنا بلاد حضارة؟
واحنا فالحين في الزفارة
فين المصري بتاع زمان؟
كله أخلاق وطهارة
صحيح بلادنا بلاد حضارة
بس آسف أقول: خسارة
مش باقي غير الحجارة
واسألوا حتى الحجارة
