صرخة فطرة.. متغيروش نفسكم علشان حد
بقلم : سهام محمد راضى
متحاولوش تغيروا الفطرة اللي ربنا خلقكم عليها…
متحاولوش تدفنوا الطيبة جواكم عشان الدنيا قاسية، ولا تخلوا قسوتها تعلمكم تبقوا زيّها.
الصدق مش ضعف، والنقاء مش سذاجة، والإحساس مش عيب.
أنا ضد كل مثل بيقولك “اقفل الباب اللي يجي منه الريح”، لأ افتحه وواجهه، حتى لو هزّك شوية، لأنك مش مصنوع من ورق… أنت بني آدم.
وأنا ضد اللي يقولك “ساير الموجة”… ليه؟ الموجة لو مش ماشية على مبادئك هتغرقك، حتى لو كنت بتضحك وانت سايرها.
أنا مش بقولك كن عاق لوالديك، أبدًا… بس ربنا نفسه قال:
“وَإِن جَاهَدَاكَ عَلَىٰ أَن تُشْرِكَ بِي مَا لَيْسَ لَكَ بِهِ عِلْمٌ فَلَا تُطِعْهُمَا”
يعني حتى أقرب الناس ليك لو ضغطوا عليك تغير عقيدتك أو تمحي نفسك عشان ترضيهم، ربنا نفسه قال “فلا تطعهما”، فازاي نرضى نلغي نفسنا عشان عادات وتقاليد، عشان كلام الناس، عشان “قالوا” و”يقولوا”؟!
الدنيا دي مش دايمة لحد، ومحدش هيدخل القبر مكانك، ومحدش هيتحاسب عنك.
لا تبص لحد، ولا تعيش بشخصية مش شخصيتك عشان ترضي اللي حواليك.
ما تمشيش على طريقتهم، إلا لو كنت شايف الطريق ده بيناسبك.
ما تحطش راسك في الرمل، ولا تلبس قناع، ولا تتنازل عن قلبك.
مفيش حد هينفعك، لا أهل، ولا أولاد، ولا أصحاب، مفيش غير ربنا.
هو اللي شايفك، وسامعك، وعارف قد إيه بتتألم علشان تبان قوي قدام الناس.
اوعى تمحي نفسك، أو تنكرها، أو تدفنها.
إوعى تتكسف من دمعتك، أو من مشاعرك، أو من رحمتك.
ولو العالم كله شايفك غبي علشان طيب، حط صباعك في عين التخين، وافتخر إنك لسه بني آدم.
الطيبة مش جريمة، والنقاء مش تهمة.
عيبنا مش فينا… عيبنا إننا بنحاول نرضي ناس مش هترضى.
اللي هيشوف فيك نقاء هيحترمه، واللي شايفك مش على هواه، مش لازم تضيّع عمرك علشانه.
دي صرخة…
صرخة واحدة من آلاف الأصوات اللي بتنزف في صمت.
مش لازم تتكلم علشان تفهم، بس اسمع… يمكن تفتكر إنك كمان كان جواك الصرخة دي ومخبيها.
إرضاء الناس غاية لا تُدرك… فلا تُهدر نفسك في محاولات مستحيلة.
اعرف إنك مهما حاولت ترضي الناس، دايمًا في حد هيلاقي حاجة مش عاجباه. وهتفضل تعدل وتبدّل في نفسك لحد ما تلاقي روحك اتغربت عنك، وانكسر جواك شيء غالي… كرامتك، طيبتك، أو حتى أحلامك.
مينفعش نعيش عمرنا نلف ورا رضا الناس وننسى رضا ربنا ورضانا عن نفسنا. أصل الناس مش مقياس، وكل واحد فيهم بيشوفك بعينه هو، بعقله هو، وممكن يكون شايفك من عقده مش من حقيقتك.
خليك صادق، نضيف، قلبك أبيض، وامشي مستقيم، وساعتها حتى لو ما حدّش قدر ده، ربنا هيعوضك وهيرضيك.
عيب كبير إنك تموت وانت لسه ما عشـت، وانت لسه ما كنتش نفسك، كل اللي عملته إنك كنت نسخة ضعيفة من غيرك، اتشكلت على مزاجهم ومبادئهم… بس في الآخر، مين هيدخل القبر؟ إنت!
فلا تقهر نفسك، ولا تمحي طيبتك، ولا تكسّر جناحاتك عشان تطير بجناحات الناس… ماحدش هيحس بيك غيرك، ومافيش غيرك هيعيش حياتك.
