رساله لمن يهمه الأمر

رساله لمن يهمه الأمر. 

كتبت ريهام مرتضي نقلا عن الأم 

رساله لمن يهمه الأمر

من أم كانت ممكن تفقد ابنها اللي في بداية حياته لولا عناية الله ولطفه

الحكايه بتبدي من أمام نادي بترو سبورت وابني وأصحابه خارجين يوم الخميس وفي مكان راقي مش حي شعبي ولا حاجه ده في التجمع الخامس ويعترضهم مجموعة شباب تانيه ويتخانقوا معاهم ويضربوا ابني في ضهره طعنة غدر نافذه للرئه قطعت الشريان الرئوي وكادت أن تصل للشريان الأورطي لولا ستر الله ولطفه

أصحابه نقلوه طبعا لأقرب مستشفى اللي كان فيها جزارين مش دكاتره حالفين قسم ويمين

ابني وصلهم بنزيف داخلي وكل اللي عملوه أنهم حطوا قطعه شاش علي مكان الجرح من غير. ما يتخذوا أي إجراء لاسعافه وفضل ابني ينزف دم لحد ما أصحابه اتصلوا بينا وبلغونا

وصلت المستشفى مش عارفه ازاي ولقيت ابني غرقان في دمه والجزارين واقفين يتفرجوا عليه صرخت وقولت لهم اسعفوه انقذوه ارجوكم ردوا لازم تروحي الحسابات .

جريت علي الحسابات قالوا لي محتاجين 50 الف جنيه تحت الحساب رديت طبعا انا مش جايه من البيت معايا المبلغ ده

طب اسعفوه وانا هبيع هدومي وادفع له بس انقذوه ارجوكم

ردوا بكل بردو أن لازم المبلغ يدفع الاول

قولت لهم طب اعملوا اشعه وطمنوني أن الحاله تستحمل اني انقلها مستشفى تانيه وكان ردهمم أن ده باكدج لازم يدفع كله وعايزين خمسين الف جنيه

قولت لهم طب طلعوا لي إسعاف توصله المستشفى قالوا مش جاي في إسعاف عشان نخرجه في إسعاف وطبعا اخدت ابني من عندهم وتقريبا مفيش فيه نبض وجريت علي مستشفى البنك الاهلي وكل همي اني الحق انقذ ابني ولولا عناية ربنا ودكاترة الطوارئ في مستشفى البنك الاهلي اللي عملوا المستحيل عشان ينقذوا الحاله اللي كله كان بيقول ميؤس منها وكانوا بيسابقوا الزمن وبيعملوا المستحيل عشان ينقذوا روح بتروح بين أيديهم من غير ما يطلبوا مني جنيه واحد ودكاترة ومشرفي الرعاية المركزة فيها اللي مكانوش بيناموا ولا بيرتاحوا لحظه لحد ما اطمنوا أن الحاله الحمد لله استقرت

انا بقول الكلام ده لأن اللي حصل مع ابني هيتكرر كل يوم ويحصل مع غيره بس الفرق أن ربنا الحمد لله كاتب له عمر بس الله اعلم غيره ممكن يحصل معاه ايه

حياة البني ادم مش لعبه ولا تجاره عشان تدفع الاول وننقذها فيه حاجه اسمها رحمه وضمير مهني يحتم عليهم ينقذوه الاول وبعد كده لو كانوا طلبوا عمري كله كنت دفعته بدون تردد عشان ابني واي حد مكاني كان هيعمل كده لأن مفيش أغلي من الضنا

ابني ضحية إهمال مستشفى بتاجر بأرواح الناس

ابني ضحية أب معرفش يربي ابنه وسابه يمشي بمطوه يدبح في ولاد الناس

ابني ضحية مجتمع فيه القدوه محمد رمضان وعبده موته

حق ابني لازم يرجع من كل اللي كان سبب في اللي حصله

مستشفى شفا التخصصي بالتجمع الخامس لازم يتحاكموا

مجلس الوزراء

وزارة الصحه المصريه

رساله لمن يهمه الأمر