خلال سنة ونص بس.. رايي في وسام ابو علي
كتب :احمد عبدالنبي
60 مباراة بـ 38 جول و10 أسيست بتيشيرت الـنادي الـ Al Ahly SC الأهم من كل ده، انه لاعب مميز في اللعب تحت ضغط، وقادر يرد كويس في الملعب، بيقولوا صفقة عادية وميستاهلش الرقم اللي اتدفع فيه؟ طب خد ياعم هداف الدوري من دور واحد، ثنائيات كل ماتش وهاتريك وهحسملك دوري تاريخي بعد ما سجلت 3 أهداف في بيراميدز خلال اسبوع واحد.لا ياعم ده بيجيب اجوال سهلة، طب خد لك جول عالمي في مازيمبي، حاجة كدة من بتوع الكابتن ماجد، على شوية اجوال من برة منطقة الجزاء، عندك مشكلة في ضربات الجزاء؟ بسيطة، بقالك سنين عندك مشكلة في الضربات الحرة؟ خد لك 6 أو 7 ضربات حرة زغرطوا في الشبكة خلال سنة بالظبط.شكله لاعب محلي؟ طب متع نظرك بهاتريك تاريخي في دوري الابطال ضد شباب بلوزداد، حاجة كدة قمة التنوع، بيصطاد الكورة في منطقة الجزاء وبعدها بيسجل ضربة حرة وبعدها بيسجل من برة الـ 18.بقاله 5 شهور مسجلش من أول 2025 وناس بيقولوا شكله طلع لاعب الموسم الواحد رغم انه اتصاب فترة طويلة وأثرت على مستواه، خلاص ولا تزعل نفسك، أحلى دور تاني تاريخي في الدوري وهيقشرلك البطولة على طبق من دهب بأروق ثنائية مع امام عاشور، 10 مساهمات خلال 7 ماتشات في مجموعة التتويج، منهم سوووبر هاتريك في لقاء حسم البطولة!🔝مش ماشية معاه في افتتاح كاس العالم للأندية، الحظ بيعانده في تاني ماتش وبيسجل هدف في نفسه، فيه ناس رجعوا يشككوا فيه من تاني ورجعوا لنغمة بيختفي في الماتشات الكبيرة، ولكن في تالت ماتش ضد فريق اوروبي كبير زي بورتو بيسجل هاتريك أسطوري قمة التنوع، فينش مميز وضربة جزاء وهيد روعة، ولولا الاصابة كان ممكن يسجل ميجا هاتريك بدون مبالغة. المفاجأة ان كل الجمال والدلال ده، لاعب متقيد محلي وليس أجنبي.وسام أبو علي بيصنع حالة جميلة خلال فترة قصيرة، لاعب بمميزات كبيرة جدًا على مستوى الشخصية قبل ما يكون لاعب بمميزات كبيرة جدًا في أرض الملعب، لعيب تتمنى تشوفه 5 أو 6 أو 7 سنين كمان بتيشيرت الأهلي وتتمنى تشوفه أسطورة من أساطير النادي وبيحقق أرقام قياسية.تسلم العين اللي اختارت
