وحشنا الإخلاص (أكمّل مع اللي بحبه ولا آخد اللي يحبني)
بقلم / الإعلامية حنان جودة
الحب مش مجرد كلمة بتتقال، ولا مشاعر وقتية بتروح مع أول خلاف.
الحب عهد ووعد، مكتوب علينا بأمر رب العالمين، وخيانة العهد هي خيانة الإخلاص والكلمة.
وحشنا نقابل ناس مخلصة، ناس تطمّن، ناس تفرح بكل حاجة بنعملها معاها، وتحس إن وجودك إضافة مش عبء.
وحشنا نكمّل مع حد بيحبنا ونحبه، لكن الأذى بقى في دم بعض البشر.
يا ترى هنفضل كده؟
هل عاجبنا حالنا؟
ولا نكمّل ونسيبها على ربنا، ونخلص لبعض، ورب العباد يرضّينا؟
اللي بيحبك بجد بيخاف عليك، بيحافظ عليك من كل كلمة، من كل وجع.
اللي كلمة منك تفرحه، عمره ما يقصد يجرحك ولا يقلّ منك، لا في حضورك ولا في غيابك.
ده شخص يستاهل، يستاهل إنك تكمّل معاه وتضحي عشانه.
ابعد عن البجح، والخاين، والخسيس،
اللي ما يشيلكش في أزمة، وجوده في حياتك مالوش أي لازمة.
ده كمالة عدد، وسيب ربنا يخلّصك منه،
لأن ربنا ما بيحبش الخسيس، ولا الخاين، ولا الندل، ولا الجبان،
وغالبًا الصفات دي كلها بتجتمع في شخص واحد عديم العِشرة.
كمّل مع اللي يحبك في ظروفك، في ضعفك قبل قوتك،
في كل حالاتك شايفك حلو،
عمره ما هيطلع فيك عيب،
هو ده اللي يستاهل تضحي عشانه.
ده رأيي المتواضع ليكم:
يا ريت نرجع نخلص لبعض،
ونسيب كل حاجة على رب العباد،
اللي خلقنا بقلوب طيبة، من غير حقد ولا غِلّ،
من غير انتقام باسم الحب،
ولا إذلال بحجة العِشرة.
اللي يحبك علشان يشوفك مذلول ومتهان مش بيحبك.
ابعد عنه، وصون نفسك وكرامتك.
ربنا خلقك عزيز النفس،
ما تتذللش لعبد، وتنسى كرامتك عند اللي خلقك.
