لحظة انهيار بتغيّر حياة
بقلم / سهير محمود عيد
في لحظة معينة… اللحظة اللي عمرك ما بتحسب حسابها… بتحصل الوقعـة اللي تكسر فيك حاجة عمرها ما بترجع زي الأول. حاجة تتشقّ جوه صدرك، مش بتتصلّح، مش بتتخيط… بتفضل علامة محفورة للأبد. اللحظة اللي بتدوّرك من جوا وتقول لك بصوت قاسي:
“انت مش الشخص اللي كنت فاكره.”
في اللحظة دي، بتكتشف إنك كنت عايش على أطراف نفسك… مش في قلبك. بتكتشف إنك كنت بتدفن وجعك، وبتضحك على نفسك. وفجأة… كل حاجة كنت مخبيها تنهار فوق دماغك مرة واحدة.
قرارات غلط… ناس غلط… محبة مهدورة… مجهود رايح لحد ماكنش شايفك أصلاً.
والكسر الحقيقي مش صوت… الكسر الحقيقي صمت.
صمت زي المقابر.
صمت يخليك تسمع وجعك بوضوح مخيف.
تسمع خيباتك وهي بتعدّي جوا دمك.
تسمع صوت قلبك وهو بيقول لك:
“أنا تعبت.”
أقسى حاجة؟
إنك تدور على حد يسندك… ومتلاقيش.
اللي قلت عليهم “عمودي الفقري” يسيبوك في أول انحناءة.
اللي كان “موجود” يختفي في اللحظة اللي كنت محتاجه فيها.
والكلمة اللي كانت بتتقال لك “إحنا معاك”… تتحول لذكرى ملهاش قيمة.
وأقسى من ده… إنك تكتشف إنك كنت طيب زيادة، صادق زيادة، وفي زيادة.
وإن الطيبة ساعات بتبقى أول طريق للانكسار،
وإن القلب اللي بيدي بدون حساب… بيتسحب منه كل شيء بدون رحمة.
لحظة الانهيار مش بتكسّر جزء منك…
هي بتكسّر النسخة الضعيفة اللي كنت لابسها.
بتكسر وهمك… قبل ما تكسر قلبك.
بتعلمك إن مفيش حد ينقذك غيرك.
بتحطك قدام مراية مافيهاش فلتر… مراية تشوف فيها حقيقة نفسك وحقيقة العالم حواليك.
والحقيقة ساعات بتكون أقسى من الوجع نفسه.
ومع إنك بتحس إنك خلاص خلصت…
فجأة تكتشف إنك بتنفس رغم كل حاجة.
إنك واقف رغم إنك وقعت.
إنك قادر تكمل رغم إن الجزء الأكبر جواك اتكسر.
وده مش قوة…
ده ربنا.
ربنا اللي بيشيلك من جوه وانت فاكر إنك خلاص اتدفنت.
وهتعدّي.
هتعدّي غصب عن الظروف، غصب عن الوجع، غصب عن الخذلان.
وهتقوم… بس مش بنفس القلب، ولا نفس البراءة، ولا نفس الثقة.
هتقوم بنسخة محدش يقدر يكسرها تاني،
لأنها اتكسرت مرة ووقفت…
ومفيش أقوى من اللي وقع وقام لوحده.
وأخيراً……
اللهم إنك تعلم ما تخفيه القلوب وما يثقل الأرواح، فخفّف عنا ما لا نُطيق، واجبر كسرنا جبرًا يليق بقدرتك، واملأ أيامنا نورًا وطمأنينة، وامنحنا قوة ننهض بها بعد كل سقوط. اللهم ارزقنا سكينة تُعيد ترتيب الفوضى في صدورنا، واجعل لنا بعد كل ضيق فرجًا، وبعد كل دمعة ابتسامة، وبعد كل انهيار بداية خير .
