……. سافر حبيبي……….

……… سافر حبيبي………..
بقلم: خالد كرومل ثابت

كالعادة لمّا أسافر كان يمنعني
يسلِّم عليّا، وعالباب يودّعني

عارف حبّه ليا، وحاسس بيه
شايف حنيته، وخوفه عليّا شابعني

عايش في حضنه، وحنانه متعنّي
ساكن في قلبه، وحبّه رافعني

عارف أبويا… هو حبيبي الغالي
ماسك إيديا، وكلام قلبه سامعني

كالعادة أغيب، والدنيا لاهِياني
وأتغرّب، والدنيا شُغلاني

يمكن نسيت المحبّة، والحب، والأهل
بس قلبه… قلب أبويا ما ناساني

راجع آخد أبويا في أحضاني
وأبوس إيده، وأحضانه اللي وحشاني

ناديت على أبويا… ما ردّش عليّا
لقيته سافر، وسابني وحداني

سابني في وجع، في حزن تقيل
بعده كسرني… وليل العمر غطّاني

خالد كرومل ثابت