النفضة النومية
بقلم / سمر جرجس مرقص
اخصائية ارشاد نفسى و اسري و زواجى و تعديل سلوك
عضو إتحاد المعالجين النفسيين العرب
عضو التحالف العربي لخبراء العلاج النفسي
وقعت قبل كدة و انت نايم؟!
حصل قبل كده انك كنت داخل في النوم فجأة جسمك كله بدأ يتهزّ كأنك وقعت من مكان عالي؟
تفتح عينيك مفزوع وتحاول تفهم أنا كنت بحلم؟
ولا في حاجة غلط؟
تعالى اقولك ده لا حلم و لا حاجة غلط دى رسالة ترحيب بتقولك أهلاً بيك في عالم “النفضة النومية”
اللحظة الغامضة اللي أغلبنا عاشها وسكت لأنه مش فاهمها
النفضة النومية ( أو اللي بيحصل وإنت بتغفل كده في أول النوم ) هي انقباضة مفاجئة في العضلات بتحصل في المرحلة الانتقالية بين الصحو والنوم.
يعني مخك لسه ما سلّمش رسمي للنوم وجسمك بدأ يفصل يحصل لخبطة بسيطة فيديك الإشارة دي
▪️في ناس بتحس إنها بتقع.
▪️ في ناس تحس إن في حد زقّها.
▪️ وفي ناس قلبها يدق بسرعة بعدها بثواني.
عارفين ليه بنحس بالوقعة دي بالذات؟
في علماء شايفين إن دي
🔺چينات الأجداد
زمان لما كان الإنسان بينام فوق الأشجار كان مخه بيعمل النفضة دي كـ “جرس إنذار” علشان يتأكد إنه لسه متوازن وما يقعش وهو غفلان.
يعني جسمك لسه شايل شفرة البقاء من آلاف السنين وبيطمن إنك في أمان!
طيب ليه بتحصل؟
في أسباب كتير محتملة
١ – إرهاق شديد.
٢ – تفكير كتير قبل النوم.
٣- توتر وضغط عصبي.
٤ – شرب كافيين متأخر.
٥ – أو حتى نوم متقطع.
الموضوع ببساطة إن الجهاز العصبي بيبقى “لسه مش مستقر”
تخيل كده ان في “خناقة لطيفة”جوه دماغك نظام عايزك تصحي ونظام عايزك تنام
والنفضة دي هي اللحظة اللي النظامين خبطوا فيها في بعض!
الأجمل بقى إن الإحساس بالوقوع ده تفسيره إن الجسم وهو بيرتخي فجأة المخ يفتكر إنك بتقع فعلاً فيبعت إشارة سريعة للعضلات الحقّي نفسك!
فتقوم العضلات تشد نفسها فجأة
دراما عصبية بسيطة بس طبيعية
المشكلة بقا مش في النفضة نفسها المشكلة في القلق بعدها
خلينى اقولك ان النفضة مش هي اللي بتصحيك الخوف منها هو اللي بيصحيك ..
لأن أول ما بتخاف جسمك يفرز أدرينالين فتصحي أكتر وتبقى حاسس إن في حاجة خطيرة حصلت و الحقيقة ولا حاجة.
هي بس رسالة صغيرة بتقولك “إنت محتاجة تهدي شوية “
لأن في الأغلب النفضة النومية بتحصل أكتر مع ..
▪️الناس اللي شايلة همّ
▪️أو اللي بتفكر لآخر لحظة قبل ما تنام
▪️ أو اللي مش بتدي جسمها فرصة يهدى تدريجياً
يعني أوقات كتير هي مش مشكلة نوم هي نتيجة يوم تقيل.
الحل مش إنك تخاف منها
ولا إنك تدور على مرض وهمي
الحل بسيط ..
🔺قلل من الكافيين بالليل
🔺 حاول تفصل موبايل قبل النوم بنص ساعة
🔺اعمل روتين هادي
( نور خافت، نفس عميق، دعاء بسيط، أو قراءة خفيفة)
ولو يومك كان مرهق اعترف بده ما تضحكش على جسمك لأن جسمك دايماً بيقول الحقيقة.
وفي الآخر …
النفضة النومية مش علامة ضعف ولا مرض ولا حاجة تخوف دي مجرد لحظة انتقال..
لحظة بين الوعي واللاوعي
لحظة بين السيطرة والاستسلام
ويمكن الرسالة الأعمق فيها إننا محتاجين نتعلم نسيب نفسنا نتستسلم للنوم من غير مقاومة.
النفضة دي دعوة من جسمك بيقولك فيها “سيب الكنترول شوية”
إحنا بنقضي يومنا كله بنحاول نتحكم في كل حاجة فبيجي النوم علشان يعلمنا إن الأمان الحقيقي هو في “الاستسلام” التام.
ناموا مطمنين ولو جسمكوا نفضكوا مرة…
افتكروا إ نه بس حارس أمين بيقولكم اهدّوا أنا لسه صاحي وبحرسكم ✨♥️ ✨
