النجاح اللى محدش قال تمنه
بقلم سيد جلال الفرماوى
النجاح حكاية الناس بتحب نهايتها
بس محدش بيقف عند نص الطريق
محدش قال ان النجاح بيوجع
وانه مش صورة ولا تصفيق ولا لقب
النجاح ساعات بيبدأ بخسارة
خسارة ناس كنت فاكرهم ضهرك
خسارة راحة كنت محتاجها
وخسارة وقت كان ممكن تعيشه اسهل
النجاح تمنه سهر طويل
وتعب محدش شايفه
وتشكيك من اقرب الناس
وسؤال بيتكرر جواك
هو انا ماشي صح ولا بضيع عمرى
النجاح مش دايما فرحة
اوقات بيبقى وحدة
لان كل ما تعلى خطوة
الدايرة بتضيق
واللى فضلوا قليلين
تمن النجاح انك تستحمل
تستحمل الغلط
وتستحمل التصحيح
وتستحمل انك تبدأ من الصفر
اكتر من مرة
وانت ساكت
تمن النجاح انك تكمل
وانت مش متشجع
وانت مش مضمون
وانت شايف غيرك سبقك
بس لسه مؤمن بطريقك
النجاح مش حظ
ولا ضربة واحدة
النجاح قرار يومى
انك تقوم
وتحاول
حتى وانت مكسور
وده التمن اللى محدش قاله
لان اللى وصلوا
حبوا الصورة
ونسوا الوجع
لكن الوجع كان البداية
وكان الشرط
وكان السر الحقيقي
