بقلم الدكتورة : نادية جمال
مكتب الشرقية
الرجوله المزيفه هي وهم بيعيش فيه بعض الرجال، للأسف لما نتكلم عن الرجوله المزيفه هنروح بسرعه للفرق بين الذكر والرجل، الرجوله تشمل معاني كتير وأكيد كلنا عارفينها، زي الشهامه الجدعنه والطيب وتحمل المسؤليه والدعم لكل عيلتك وأصحابك وزمايلك والذكاء في التعامل والتحكم في عصبيتك وقت المشاكل وإحترامك للصغير والكبير وتقدير ذاتك، وده هيكون واضح في حب وتقدير وإحترام الناس ليك في معظم مواقفك.
الإعتذار وقت ما تحس بغلطك والتراجع عن كلامك لو حاسس إنه هيظلم شخص، إنك تعرف تسمع وتدير حوار، إنك تحتوي أقرب ناس ليك وبإقتناع.
لكن لو إتكلمنا عن الذكر هيختلف الكلام تماماً الصوت العالي والجفا في المشاعر والعنف اللفظي والبدني مع أهل بيته، عدم إحترام زوجته ولما يغلط ميعرفش يعتذر، الرجوع في كلمته بيعتبره إهانه ليه حتي لو إقتنع ان قراره غلط مبيعرفش يسمع أو يناقش، طول الوقت العصبيه والصوت والتحكم والإهانه طباعه وشكل تعاملاته.
وأخيراً راجع نفسك وصحح من غلطك لأن وجودك بالشكل الصح هو نجاحك وسعاده وأستقرار أسرتك ومجمتعك ككل.
